رجعت للبلوج سبوووت حبيبي من تاني ولكن بشكل جديد

بصراحة انا كنت عامل بلوج على ورد بيرس كانت اغلبية المدونات الي موجودة هنا منه وشفت من وجه نظري ان البلوج سبوت أشد وأجمد من ورد بيرس في ناس كتير بتفتكر ان ورد بيرس هو احسن بس انا من رأي ان بلوج سبوت احسن وكفاية انها خدمة من خدمات الشركة العملاقة جوجل الي فتحت لناس كتير ابواب العلم والمعرفة في الأنترنت والتكنولوجيا دة شيء محدش يقدر ينكره ولكن في ناس كتير بتحب ورد بيرس وانا من فترة مش كتيرة يعني عملت بلوج هناك بالورد بيرس كان شامل كل شيء وفي اي شيء مختلف تماماً عن البلوج القديم بتاعي , وانا قررت أنقل البوستات الي هناك هنا واشيل البلوج التاني القديم وأعتذر من الناس الي كانوا بيتاعبوني عليها وحذف تعليقاتهم لأنها كانت تقيلة اوي على قلبي قسماً بالله كنت بحس اني بكتب حاجات غصب عني وحسيت فيها انها مليانة هموم واحزان وصراحتن مش طبعي كدة بتاتاً ولكن انا دخلت في فترة كانت اغلبية المدونين حزنانين ومش عارف لية وأنا بطبعي بحب أتقلم مع المجتمع الي حواليا يعني لما دخلت ورد بيرس كان المجتمع فيه عادي مكنش في هموم كتير وحاجات من دي فعلشان كدة كنت بكتب بوستات جامدة والله بجد يعني في ناس الحمدلله كانت بتستفيد مني وانا اهم حاجة عندي لما اكون عامل مدونة ان افيد الناس بالي اعرفه ومش مهم المقابل لاني مؤمن بمقولة "أعمل الخير وأرميه البحر" وغير كدة مكنتش بتكلم في مجال عملي كتير في البلوج القديم بتاعي يعني كانت اغلبية البوستات لمشاريع جديدة ورأي في حاجة معينة بس يعني كان في اختلاف بين مدونة الورد بيرس بتاعتي السابقة قبل نقلها لي هنا وبين المدونة الي شلتها في بلوج سبوت علشان اعمل دي مكانها فـ سبحان الله قررت أني أعمل بلوج جديدة بنفس البروفايل علشان مخسرش برضوا الناس الي تعلقت فيهم وبمدوناتهم الجامدة والي كنت بعلق عندهم علشان مش بحب أخسر الناس بالعكس طبعي أحب اكسب اكتر عدد ممكن من الناس , واهو عملت مدونة جديدة بس بشكل جديد ولكن بنفس البروفايل وان شاء الله تعجبكم مع اني عارف ان معظم المدونين الي كانوا متابعين مدونتي السابقة الي في الحقيقة أنحزفت اغلبيتم شعراء ورجال دين ورجال أدب وقلة الأدب كتير والفلسفة وحاجات كتير وغالباً جداً يكون حد مهتم بمجال عملي الي هو بالأساس التقنية يعني أنا بحب التكنولوجيا بكل أنواعها انا الي يشوف غرفتي يحس انه داخل أله زمن




لاني بكليه علوم الحاسب الألي وغير كدة والدي اكرم الله وجه العفيف مع انه مش بيحب الكمبيوتر سبحان ربي ولا يعرف فيه حاجة خالص غير يمكن الورد والأكسل علشان مجال عمله الا انه حببني في المجال دة من صغري من ايام ويندوز 95 لما كان البنت لسة بتعمل قصة الحلزونة دي الي تشبه الزحلقة فوق عينيها , يعني الموضوع كبير بالنسبة لي ومتهم فيه والحمدلله بعرف حاجات كتيرة بحس انها هتفيدني وهتفيد غيري كتير وأدينا بندردش ورانا اية ورانا اية ما احنا في الكمبيوتر يبقى لازم نتكلم في الكمبيوتر تعرفوا لو احنا في امريكا اكيد هنتكلم عن امريكا مش هنتكلم عن مصر يعني وما هي الحياة غير حاجات فوق بعض يالحب لا بس انا بجد مش هكتب بوستات تقنية كتير علشان انا بتخنق بسرعة المدونة ان شاء الله هتشمل مجالات كتير في كل حاجة واتمنى من كل قلبي ان يعجبكم النقلة الجديدة والقوية دي والبوستات هتقبى جامدة يا ليلى